8 сентябрь көнне Яңа Чишмәдә «Нечкәбил»матурлык, гаилә һәм аналар республика конкурсы кысаларында Татарстан Гаиләләре фестиваленең зона сайлап алу туры узды
Фестивальне ачу тантанасында катнашучыларны һәм кунакларны жюри рәисе, ТР Дәүләт Советы Рәисе урынбасары Римма Ратникова, «Нечкәбил» конкурсы җитәкчесе Изольда Жуйкова, район башлыгы урынбасары Надежда Попкова сәламләде.
Конкурс мәйданчыгында Татарстанның 10 районыннан килгән хатын-кызлар иҗади номерларын күрсәттеләр, үзләре пешергән ризыклардан әзерләнгән өстәл тирәли гаилә бәйрәмнәрен күрсәттеләр. Бәйрәм өстәле артында гаилә үзләренең гореф-гадәтләре, йолалары, тормышларының шатлыклы һәм бәхетле мизгелләре турында сөйләделәр. Безнең районны Сәхәбетдиновлар гаиләсе тәкъдим итте.
Конкурс чыгышлары тәмамлангач, төрле номинацияләрдә катнашучыларны һәм җиңүчеләрне бүләкләү тантанасы булды. Конкурс финалистлары сентябрь аенда Алабуга, Тәтештә һәм Казанда узачак барлык сайлап алу турлары үткәннән соң билгеле булачак.