Гаилә көненә багышланган бәйрәмне «Хыял»социаль приютында үткәрделәр.

8 июльдә Аксубай муниципаль районының «Хыял» балалар һәм яшүсмерләр өчен социаль приютында Гаилә көненә багышланган бәйрәм узды.  Бәйрәм Гаилә Гимны белән башланды. Тәрбияләнүчеләр һәм аларның әти-әниләре бәйрәмдә актив катнаштылар, җырладылар һәм биеделәр, гаилә турында мәкальләрне, әйтемнәрне искә төшерделәр, табышмакларны чиштеләр, һәркайсы үз гаиләсенең гореф-гадәтләре турында сөйләде. Балалар әти-әниләре белән бергә «Ромашка» аппликациясен башкардылар, идеаль гаилә портретын ясадылар.   Катнашучылар үз хисләрен һәм тойгыларын сәнгать аша белдереп, яратып иҗат иткәннәр. Гаилә, мәхәббәт һәм тугрылык көне уңаеннан «Гаилә Объективта»акциясе үткәрелде. Бер ай дәвамында педагоглар ата-аналарга балалары белән бергә истәлеккә матур фотолар ясарга тәкъдим иттеләр. Бүгенге чарада тәрбияләнүчеләр әти - әниләре белән берлектә педагог Лилия Петровна ярдәмендә фотолар бастырып чыгардылар һәм «гаилә объективта»дигән коллаж-плакат ясадылар. Бергә эшләү акциядә катнашучыларга бәйрәм кәефе бүләк итте.  Бәйрәм балаларга һәм аларның ата-аналарына гаиләнең мөһимлеген, гаилә бәйләнешләрен, хөрмәт, мәхәббәт, тугрылык кебек гади кешелек сыйфатларының теләсә нинди киртәләрне ничек җиңә алуы турында аңлау тәрбияли.