Иске Кыязлы авыл җирлеге башлыгы Газинур Дәүләтшин 2024 елга җирлекнең социаль-икътисадый хәле турында хисап тотты.

  Җирлек составына өч авыл керә: Иске Кыязлы, Кызыл Тау, Яңа Кыязлы. Узган ел җирлек территориясендә 30 кеше вафат булган, 2 бала туган. Территориядә ике инвестор – "Ханипов А.В." КФХ һәм "Идел Селект"эшли. Шәхси эшмәкәрләр Хәниф Сруров, Фаиз Яруллин крестьян-фермер хуҗалыклары эшли. Халыкка ярдәм кирәк булганда, алар аны һәрвакыт күрсәтергә әзер. Җирлектә башкарыла торган төп эшләр үзара салым программасы белән бәйле. Бу акчага авыл урамнарына вак таш салынды, урамнарны яктырту үткәрелде. Балалар уен мәйданчыгы өчен җиһазлар кайтарылды. Янгын сүндерү машинасы өчен кирәкле җиһазлар сатып алынган. Үзара салым акчаларының бер өлеше кыш көне юлларны кардан чистарту өчен кулланыла. Чыгыш ясаучы шулай ук сәламәтлек саклау, мәгариф учреждениеләре эшчәнлеген билгеләп үтте. Иске Кыязлы мәктәбендә дәүләт программасы ярдәмендә азык-төлек блогына капиталь ремонт ясалган. Узган ел Иске Кыязлыда ачылган модульле яңа фельдшер-акушерлык пункты халыкка беренчел медицина ярдәме күрсәтү өчен кирәкле барлык әйберләр белән җиһазландырылган. Мәчетләрне төзекләндерү буенча күп эш башкарылды. – Быел Иске Кыязлы һәм Кызыл Таудагы җирләрне, ике мәчет биналарын рәсмиләштерә башларга, кәгазь эшләрен тәртипкә китерергә кирәк, - дип ассызыклады чыгыш ясаучы. Бүгенге көндә җирлектән ун ир-ат махсус хәрби операциядә хәрби бурычларын үти. Ел дәвамында якташ көрәшчеләргә актив ярдәм күрсәтелде. Агымдагы елда үзара салым буенча һәр кешедән 500әр сум җыярга уйлыйлар. Бу акчага Иске Кыязлыда Сөлчә елгасы аша күперне ремонтлау, запас насос, урам юлларын ремонтлау өчен вак таш, шулай ук трактор өчен яңа чапкыч сатып алу планлаштырыла. Кызыл Тауда чишмәне төзекләндерергә, юлларга вак таш түшәргә, Яңа Кыязлы авылында урам юлларын тигезләргә кирәк. Бөек Ватан сугышында Җиңүнең 80 еллыгын бәйрәм итүгә Иске Кыязлы авылында һәйкәлне ремонтлау планлаштырыла. Кызыл Тау авылының су белән тәэмин итү системасын тулысынча алыштыруны таләп итә. Авыл халкы шулай ук яңа клуб төзүне сорый. Яңа Тимошкино белән Иске Кыяз арасындагы юлга зур ремонт ясарга кирәк. Район Башкарма комитеты җитәкчесе Алмаз Мингулов, халык алдында чыгыш ясап, район буенча бүгенге хәлләр турында сөйләде, халыкның сорауларына җаваплар бирде. Җыен авыл хуҗалыгы ветераннарына һәм авыл активларына район Башкарма комитеты җитәкчесеннән юбилейлар уңаеннан Рәхмәт хатлары һәм бүләкләр тапшыру белән тәмамланды. Чыганак: https://aksubayevo.ru/news/news/v-selskix-poseleniiax-nasushhnye-voprosy-resaiut-na-sxodax-grazdan