Казан милли тикшеренү техник университеты (Казан шәһәре) вәкилләре Аксубай бистәсе урта мәктәпләрен тәмамлаучылар белән очрашты.

  Аксубайның 3 нче урта мәктәбе базасында Казан милли тикшеренү технология университеты (КНИТУ) вәкилләре тарафыннан Аксубай бистәсе урта гомуми белем мәктәпләренең 10-11 сыйныф укучылары өчен һөнәри юнәлеш бирү чарасы узды. Чарада өч институт вәкилләре катнашты: нефть, химия һәм нанотехнологияләр институты, полимерлар институты һәм җиңел сәнәгать, мода һәм дизайн институты. Чара барышында институт вәкилләре үз институтлары турында гына түгел, ә университет составына керүче башка институтлар турында да мәгълүмат белән уртаклаштылар. Балалар төрле юнәлешләр буенча узып баручы баллар турында гына түгел, ә кергәндә өстәмә баллар алу серләрен дә белделәр. Студентлар өчен нинди күләмдә стипендияләр каралган? Тулай тораклар кайда урнашкан һәм аларда студентлар ничек яши? Бу сорауларның барысы да университеттагы тормыш турында тулы итеп сөйләү нәтиҗәсендә үз җавапларын тапты. Студентларның спорт һәм мәдәни тормышы да мөһим темага әверелде. Балалар студентларның мәнфәгатьләрен һәм хоббиларын үстерү өчен университетның нинди мөмкинлекләр бирүен, шулай ук катнашу өчен нинди мәдәни чаралар булуын белделәр. Казан милли тикшеренү технология университеты вәкиле белән очрашу нәтиҗәсендә балалар киләчәк белем һәм студент тормышы турында кыйммәтле мәгълүмат алдылар. Бу очрашу һөнәри үсеш һәм үз-үзеңне тормышка ашыру юлында бик мөһим адым булды!