Карантин чаралары турында.

  Ильяс Сөләйманов районның сөт терлекчелеге белән шөгыльләнүче уңышлы фермерларының берсе. Ул даими рәвештә терлекләрне яңарту белән шөгыльләнә. Күптән түгел ул Киров өлкәсеннән голштин токымыннан 33 баш нәселле тана алып кайткан. Терлекләр читтән кертелгәннән соң аерым бүлмәдә карантин узалар. Карантин вакытында ветеринария берләшмәсенең һәм Республика ветеринария лабораториясенең ветеринария белгечләре тиешле карантин чаралары үткәрә: кайбер йогышлы авыруларны тикшерү өчен кан пробалары алу , гельминт йомыркаларын тикшерү өчен тизәк алу, җенси системадагы йогышлы авыруларны бетерү өчен җенси органнардан юып төшерү, туберкулинизация, вакцинация. Карантин уртача 30 көн дәвам итә. Бу вакыт узгач, лаборатор тикшеренүләрнең канәгатьләнерлек нәтиҗәләре булганда, хайваннар гомуми көтүгә кертеләчәк.