Район мәдәният йортында Кырымның Россиягә кушылуына багышланган тантаналы чара узды.

  18 март — Россия тарихында Кырымның Россия Федерациясе белән кушылуын билгеләп үтүче мөһим дата. Әлеге дата уңаеннан район мәдәният йортында тантаналы чара узды. Чарада районның гомуми белем бирү учреждениеләре укучылары һәм Аксубай универсаль технологияләр техникумы студентлары катнашты. Аксубай муниципаль районы Башкарма комитеты җитәкчесе Алмаз Мингулов, Үзәк хәрби округ инспекторы генерал-майор Анатолий Молоствов, махсус хәрби операциядә катнашучы Руслан Терегулов, Аксубай һәм Чирмешән районнары хәрби комиссары Рушан Даутов, Казан югары танк училищесы вәкилләре чараның мәртәбәле кунаклары булды. Чарада укучыларга Кырым тарихы, 2014 елның март вакыйгалары һәм Кырым белән Севастопольнең Россияга кушылуының әһәмияте турында сөйләделәр. Шулай ук яшь егетләргә һәм кызларга Жуков орденлы Казан югары танк команда училищесында укуның өстенлекләре һәм хәрби һөнәрнең абруе турында сөйләделәр. Танк училищесының өченче курс курсанты укучыларга уку йортындагы тәртип турында сөйләде. Әлеге чара кысаларында балалар Кораллы Көчләрдә хезмәт итү мөмкинлекләре һәм перспективалары, хәрби уку йортларына керүнең өстенлекләре турында белделәр.