Авыл хуҗалыгы министры Оксана Лут Россия мелиорация комплексын үстерү буенча киңәшмә үткәрде.

  АПК идарәсенең төбәк органнары катнашындагы чарада авыл хуҗалыгы билгеләнешендәге җирләрне әйләнешкә кертү һәм аларның уңдырышлылыгын арттыру мәсьәләләре буенча фикер алыштылар. Климат үзгәрешләре шартларында җир ресурслары белән нәтиҗәле идарә итүнең төп инструментларыннан берсе булып мелиорация, шул исәптән гидромелиорация, яңа җирләрне әйләнешкә кертү чаралары, шулай ук туфракны деградациядән саклау һәм аларның уңдырышлылыгын торгызу тора. Оксана Лут билгеләп үткәнчә, Россиядә сугарылган җирләрнең гомуми мәйданы 9,4 млн га тәшкил итә, шуның 7 млн га диярлек авыл хуҗалыгы җитештерүендә кулланыла һәм бары тик 1,2 миллионы гына чынлыкта сугарыла. 2022 елдан мелиорация комплексын үстерүгә һәм җирләрне әйләнешкә кертүгә юнәлдерелгән дәүләт программасы гамәлдә. Аны гамәлгә ашыруга 2030 елга кадәр федераль бюджеттан 232 млрд сум каралган. Бу вакытка 13 млн га җирне файдалануга тапшырырга, шулай ук 7 млн га җирнең сыйфат характеристикаларын күтәрергә кирәк.