Татарстанда ятим балалар өчен 4,6 миллион сумнан башлап торак  алуга торак сертификатлары кертелде.

  Татарстанда ятим балаларга 4,6 млн сумнан башлап торак сатып алуга яисә ипотека түләүгә торак сертификатлары кертелде. Бу хакта Торак сәясәте һәм инфраструктура үсеше комитеты утырышында ТР Мәгариф һәм фән министры урынбасары Алсу Әсәдуллина хәбәр итте. Исемлеккә кертелгән ятим балалар арасыннан булган затлар түбәндәге шартларны үтәгәндә түләүләргә хокуклы: - мөрәҗәгать итүченең 23 яшькә җитүе; - расланган керемнең хезмәт өчен түләүнең минималь күләменнән дә ким булмавы; - салым бурычы булмау; - психик авырулар һәм бәйлелекләр булмау; - хөкем ителмәү һ. б. Барлык шартлар үтәлгәндә торак мәйданы 33 кв.метрдан да ким булмаганда түләү сатучыга турыдан-туры күчерелә. Мондый түләү бер тапкыр бирелә, ә түләүне алган зат алга таба торак урын алуга дәгъва итә алмый һәм мохтаҗлар исемлегеннән төшерелә. Аксубай районыннан ата-ана тәрбиясеннән мәхрүм калган ике бала торак сертификаты буенча торак алу хокукын гамәлгә ашырды.