Халык саны 21 000 нән 35 000 гә кадәр булган муниципаль берәмлекләр арасында Аксубай районы «Татарстанның мәдәни башкаласы»конкурсының II дәрәҗә лауреаты булды.

  Татарстанда иң масштаблы мәдәни конкурсларның берсе – «Татарстан Республикасының мәдәни башкаласы» республика конкурсы тәмамланды, ул Гаилә елында мөһим вакыйгага әверелде. Конкурс үзешчән коллективлар һәм артистларның иҗади чыгышлары аша традицион гаилә кыйммәтләрен тәкъдим итүгә юнәлдерелгән иде һәм патриотизм темасына аерым игътибар биреп, Татарстан Республикасы Рәисе Р.Н.Миңнеханов кушуы буенча узды. Чара кысаларында республика халкы һәм кунаклары Татарстанның 35 муниципаль берәмлегенең уникаль милли традицияләре, гореф-гадәтләре һәм казанышлары белән таныша алдылар. Конкурс 20 000нән артык катнашучыны берләштерде, алар арасында 500дән артык эшмәкәр һәм 608 иҗат коллективы бар иде. Чара онлайн-форматта 1 миллионнан артык тамашачыны җәлеп итте. Халык саны 21 000 нән 35 000 гә кадәр булган муниципаль берәмлекләр арасында Аксубай районы II дәрәҗә лауреат исеменә лаек булды. «Татарстанның мәдәни башкаласы» конкурсы җәмгыятьнең традицион кыйммәтләр һәм мәдәни мирас тирәсендә берләшүенең ачык мисалына әверелде, бу, һичшиксез, республикабызның мәдәни тормышын  үстерүгә ярдәм итәчәк.