Татарстан Бөтенроссия агродиктантына кушыла.

  Бөтенроссия агродиктанты 2025 елның 8 октябреннән 12 октябренә кадәр агросәнәгать комплексы атналыгы чорында офлайн форматта 89 төбәктә 300 мәйданчыкта, шулай ук онлайн — рәсми платформада агродиктант.рф узачак. Татарстан халкы өчен Агродиктантта катнашу-үз белемнәреңне тикшереп кенә калмыйча, илнең заманча һәм технологик агросәнәгать комплексы белән якыннан танышу мөмкинлеге дә ул. Диктантны бөтен ил буйлап 1 миллионнан артык кеше язар дип көтелә. Үз белемнәрен һөнәри эшчәнлеге илнең агросәнәгать комплексына бәйле булмаган мәктәп укучылары, студентлар, гражданнар, шулай ук профильле белемле һәм АПК өлкәсендә эш тәҗрибәсе булган кешеләр тикшерә ала. Һәр категория өчен тиешле сораулар эшләнәчәк. Быел Агродиктант беренче тапкыр үткәрелә һәм авыл хуҗалыгы һәм эшкәртү сәнәгате хезмәткәрләре көненә туры китереләчәк. Проект «Бердәм Россия» партиясенең «Россия авылы» федераль партия проекты һәм генераль иганәчесе – «Россельхозбанк»АҖ ярдәмендә гамәлгә ашырыла. Агродиктантның максаты-авыл хуҗалыгын, аграр һөнәрләрне һәм авыл тормышын үстерү, халыкның Россия агросәнәгать комплексы турында хәбәрдарлыгын арттыру, шулай ук заманча югары технологияле тармак казанышлары өчен патриотик горурлык булдыру. Катнашучыларга авыл хуҗалыгының төрле тармакларыннан 30 сорауга җавап бирергә тәкъдим итәчәкләр, алар арасында: туфрак һәм мелиорация, үсемлекчелек һәм үсемлекләрне яклау, терлекчелек һәм нәсел эше, азык һәм ветеринария, балык хуҗалыгы һәм аквакультура, инфраструктура һәм авыл территорияләре, азык-төлек продуктлары җитештерү, АПК продукциясен экспортлау, авыл хуҗалыгын цифрлаштыру, АПК өчен җайланмалар һәм авыл хуҗалыгы техникасы һәм агротуризм. Катнашучыларга биремне үтәүгә 45 минут бирелә. "Бүген гражданнарда аграр тармакның әһәмиятен аңлау аеруча мөһим — азык-төлек иминлеге нигезе буларак кына түгел, ә һөнәри һәм шәхес үсеше өчен перспектив юнәлеш буларак та. Агродиктант кебек агарту проектлары аграр һөнәрләрне популярлаштыру, белем дәрәҗәсен күтәрү һәм яшьләрне авыл территорияләрен үстерүгә җәлеп итү өчен нәтиҗәле коралга әверелә», - дип билгеләп үтте Татарстан Республикасы Авыл хуҗалыгы һәм азык-төлек министрының беренче урынбасары Ленар Гарипов. Порталда теркәлү http://агродиктант.рф  1 сентябрьдән башлана һәм ай буена дәвам итәчәк. Катнашу нәтиҗәләре буенча һәр теркәлгән катнашучы электрон сертификат, ә җиңүчеләр диплом алачак.