Алмаз Мингулов бертавыштан Аксубай районы башлыгы итеп сайланды!

  23 сентябрьдә Татарстан Республикасы Аксубай муниципаль районы бишенче чакырылыш Советы сайлаулардан соң беренче утырышы булды. Утырыш кысаларында депутатлар Җирле үзидарәнең яңа структурасын формалаштыруның төп мәсьәләләрен карады. Көн тәртибендә-барлык дәрәҗәдәге сайлауларга йомгак ясау, Башкарма комитетның элекке җитәкчесе вәкаләтләрен вакытыннан алда туктату, башлыкны һәм аның урынбасарын сайлау, Советның даими комиссияләре составын һәм структурасын раслау, шулай ук Башкарма комитет җитәкчесе вазыйфаларын башкаручыны билгеләү һәм әлеге вазыйфаны биләүгә конкурс оештыру. Яшерен тавыш бирү нәтиҗәләре буенча Алмаз Минвазых улы Мингулов бертавыштан Аксубай муниципаль районы башлыгы итеп сайланды. Үзенең чыгышында ул Татарстан Республикасы Рәисе Рөстәм Миңнехановка, районның һәр кешесенә ышаныч  өчен рәхмәт белдерде һәм район Уставының 36 статьясы нигезендә тантаналы рәвештә ант кабул итте. ⁣ Шулай ук тәҗрибәле һәм сыналган хезмәттәше Илшат Минсабир улы Заһидуллин да бертавыштан район башлыгы урынбасары итеп сайланды, аның район белән идарә итүдә катнашуы үзгәрешсез кала. Советның яңа чакырылышы төп кадрлар мәсьәләләрен төгәл, килешенгән һәм демократик хәл итүдән башланып китте.Аксубай районы иминлегенә масштаблы планнарны тормышка ашыруга ышанычлы старт бирелде!