Роспотребнадзор котыру авыруын профилактикалау буенча тәкъдимнәр турында хәбәр итә

  Котыру авыруы—  аеруча куркыныч кискен вируслы йогышлы авыру. Чирне дәвалау чаралары юк, саклануның бердәнбер ысулы-профилактик вакцинация. Кешегә авыру хайван тешләгәндә, тырнаганда йога. Шулай ук зарарланган хайванның төкереге авыз, күз яки борын куышлыгының лайлалы тышчаларына эләккән очракта да инфекция йоктырырга мөмкин. Шуны белү мөһим: котыру вирусы авыру билгеләре барлыкка килгәнче 10 көн алдан авыруның төкерегендә булырга мөмкин. Котыру авыруын профилактикалау үз эченә вакцинацияне, кыргый һәм хуҗасыз хайваннар белән контактта үз-үзеңне тоту кагыйдәләрен үтәүне ала. Россиядә котыру авыруын кузгатучы төп чыганаклар булып йорт этләре һәм мәчеләр, ә кыргый хайваннар арасында — төлке, ярканат, керпе, бурсык, бүре һәм янутсыман этләр тора. Сыер, сарык, ат яки кимерүчеләр белән контакт нәтиҗәсендә авыру йогу сирәгрәк очрый. Инфекция йоктыруны булдырмас өчен, кыргый хайваннар белән элемтәдән тыелыгыз, алар потенциаль куркыныч. Урманда төлке яки бурсык очратсагыз, аларны кулга алмагыз, сыйпамагыз, ашатмагыз, шулай ук өйгә алып кайтмагыз. Балаларга таныш булмаган хайваннар белән аралашырга ярамый икәнен аңлатырга онытмагыз. Хәтта дача участогына кергән керпеләр, йорт чормаларында яшәүче ярканатлар һәм паркта очрый торган тиеннәр дә куркыныч булырга мөмкин. Йорт хайваннарын тоту кагыйдәләрен үтәгез. Ел саен аларны котыру авыруына каршы вакциналагыз – мондый прививкалар бушлай ясала. Этләрне кыска тезгендә  , ә сугышчы яки эре этләрне – борынчык кидереп йөрергә чыгарыгыз. Үз хайваннарыгызны йортсыз хайваннар белән элемтәдән сакларга кирәк. Этләрне һәм мәчеләрне ветеринария таныклыгы булганда гына сатарга, сатып алырга һәм траспортта йөртергә була .   Хайванның авыруы булганда, бигрәк тә котыру авыруы симптомнары барлыкка килгәндә (үзен тотышы үзгәрү, селәгәе күп агу, йотуы кыенлашу, көзән җыеру), ашыгыч рәвештә якындагы ветеринария станциясенә мөрәҗәгать итегез, үзегез дәвалау белән шөгыльләнмәгез. Әгәр сезнең хайван кешене тешләгән икән, зыян күрүчегә адресыгызны бирегез һәм хайванны карау һәм күзәтү өчен ветеринария табибына илтегез. Караучысыз калган эт һәм мәчеләргә тимәгез. Сукбай эт яки мәчеләр була торган урыннарда балаларны караучысыз калдырмагыз. Аларны сыйпау, ашату һәм үз яныңа якын китерү куркыныч, чөнки алар авыру булырга мөмкин. Тешләгәндә, тырнаганда  яки хайван төкереге эләгергә мөмкин булган барлык урыннарны 15 минут дәвамында сабынлы эремә белән, аннары краннан аккан су белән ашыгыч рәвештә юарга кирәк. Шуннан соң яраны водород перекисе эремәсе һәм яраның кырый өлешен 5 процентлы йод төнәтмәсе белән эшкәртегез. Табибка визитны кичектереп тормагыз-яшәү урыны буенча травматолог-табибка кичекмәстән мөрәҗәгать итәргә кирәк. Вакытында күрсәтелгән антирабик ярдәм генә кешедә котыру авыруын булдырмый кала ала. Рабикага каршы прививкалар курсы никадәр иртәрәк башланса, авырудан саклый торган иммунитет эшләп чыгару шулкадәр тизрәк булачак. Котыруга каршы прививка, мәҗбүри медицина иминияте полисы булуга карамастан, бушлай ясала. Вакцинаны иңбаш мускулына мөрәҗәгать көнендә ясыйлар, ә аннан соң – тешләгәннән соң 3, 7, 14, 30 һәм 90 көннәрдә. Дәвалану вакытында алкоголь куллану киңәш ителми. Йорт хайваннарын тоту кагыйдәләрен үтәү, кыргый һәм караучысыз хайваннар белән аралашканда саклык чараларын үтәү, шулай ук вакытында ясалган вакцинация сезне котырудан сакларга ярдәм итәчәк!