Аксубай урман хуҗалыгы ел йомгаклары ясады һәм яңа бурычларга әзерләнә.
Район Советының утырышлар залында Аксубай урманчылыгы һәм урман
хуҗалыгы коллективларының 2025 елгы эш йомгакларына һәм 2026 елгы янгын
куркынычы һәм урман культуралары сезонына әзерлеккә багышланган
киңәйтелгән утырышы булды.
Утырышта Татарстан Республикасы Урман хуҗалыгы министрының беренче
урынбасары Илгизәр Зарипов, район башлыгы Алмаз Мингулов, урманчылык һәм
урман хуҗалыгы җитәкчеләре һәм хезмәткәрләре, авыл җирлекләре башлыклары
катнашты.
Урманчылык эшчәнлеге йомгаклары турында төп доклад белән җитәкче-баш
урманчы Андрей Ильмухин чыгыш ясады. Ул урманнарны саклау, яклау һәм
яңадан торгызу буенча дәүләт йөкләмәсен үтәү нәтиҗәләренә җентекләп
тукталды, шулай ук узган елдагы төп эш күрсәткечләренә анализ ясады.
Урман хуҗалыгының җитештерү казанышлары һәм алдагы елга бурычлар турында
директор Сергей Кузнецов сөйләде. Профсоюз комитеты эше турындагы хисап
белән аның рәисе чыгыш ясады.
Министрның беренче урынбасары Илгизәр Зарипов Аксубай урманчылыгы һәм
урман хуҗалыгы эшчәнлегенә югары бәя бирде, коллективның куелган
бурычларны үтәүгә профессиональ якын килүен билгеләп үтте. Үзенең
чыгышында ул 2026 елга эшнең өстенлекле юнәлешләрен билгеләде, янгын
куркынычы сезонына әзерлеккә һәм урман торгызу чараларының сыйфатына
аерым басым ясады.
Утырышта катнашучылар яңа сезонда районның урман тармагы алдында торган
актуаль бурычларны хәл итү юлларын билгеләде.