Татарстан Хөкүмәте һәм Росреестр арасында төбәк территорияләренең капитализациясен арттыру буенча чаралар планы имзаланды.

  Росреестр җитәкчесе урынбасары Людмила Лилина һәм Татарстан Республикасы премьер-министрының беренче урынбасары Рөстәм Нигъмәтуллин комплекслы чаралар планын (юл картасын) имзаладылар. Аның нигезендә республикада 2026-2028 елларда күчемсез милек объектларының исәпкә алу-теркәү гамәлләрен оптимальләштерү һәм төбәк территорияләренең капитализациясен арттыру буенча эш алып барылачак. "Ил территорияләрен капиталлаштыруны арттыру бурычы РФ Президенты тарафыннан куелды, һәм без регионнар белән бергәләп аны һичшиксез үтәү өчен бөтен көчебезне куярга тиешбез. Бу регионнарның һәм ил икътисадының нәтиҗәле үсешенә юнәлдерелгән бөтенләй яңа алым. Дәүләт кадастр бәяләве капитализацияләүнең төп коралы булып тора, аның өчен бердәм дәүләт күчемсез милек реестрыннан сыйфатлы мәгълүматлар кирәк, бу юнәлештә Росреестр командасы актив эш алып бара. 2026-2027 елларда чираттагы кадастр бәяләү циклы уза, 2026 ел исемлегенә бөтен ил буенча 60 миллионнан артык җир кишәрлеге кертелгән. Шуны да билгеләп үтәсем килә, Татарстан Республикасы буенча бүгенге көндә БДМРНга 4,5 млн күчемсез милек объекты турында мәгълүмат кертелгән. Юл картасы нигезендә, 2028 елга төбәктә күчемсез милек объектларының суммар кадастр бәясе буенча 28,4 трлн сум күләмендә күрсәткечкә ирешергә кирәк. Шулай ук имзаланган документ кысаларында масштаблы эш блогы – кешеләр Росреестр хезмәтләрен сыйфатлы һәм оператив рәвештә алсын өчен исәпкә алу-теркәү гамәлләре системасын камилләштерү», - дип билгеләде Людмила Лилина. Кадастр бәяләве, территорияләрне капиталлаштыру, исәпкә алу-теркәү эшчәнлегендә үзара хезмәттәшлек һәм башка мәсьәләләр кертелгән комплекслы юл картасы имзаланган беренче төбәк-Татарстан булды. Төп бурычларга шулай ук көнкүреш күчемсез мөлкәтенә, федераль бюджет акчалары исәбеннән төзелә торган күпфатирлы йортларны, социаль әһәмияткә ия объектларны да кертеп, дәүләт һәм муниципаль хезмәтләр күрсәтүнең нәтиҗәлелеген арттыру чаралары керә. "Керемлелекне тәэмин итү дәүләт мөлкәте һәм җир ресурслары белән нәтиҗәле идарә итүнең иң мөһим өлешләреннән берсе, социаль программаларны гамәлгә ашыру өчен акча чыганагы булып тора. Мөлкәт һәм җир кишәрлекләре белән идарә итүдән салым һәм салым булмаган керемнәр базасын булдыру өчен аларны дөрес бәяләүне, кадастр исәбенә куюны тәэмин итү мөһим. Җир кишәрлекләрен һәм территорияләрне хуҗалык әйләнешенә вакытында, шул исәптән торак төзелеше максатларында, нәтиҗәле җәлеп итү Татарстан Республикасының берләштерелгән бюджетына керем өлешен арттыруга уңай йогынты ясаячак", - диде Рөстәм Нигъмәтуллин. Шундый ук документларны тагын берничә төбәк белән имзалау планлаштырыла.