Казанда «Сәйяр»республика балалар һәм яшүсмерләр театрлары фестивале җиңүчеләрен һәм призерларын бүләкләү тантанасы узды.

  «Сәйяр» республика балалар һәм яшүсмерләр театрлары фестивале җиңүчеләрен һәм призерларын бүләкләү тантанасы 20 майда Казанның Ленин исемендәге мәдәни-ял итү комплексында узды. "Сәйяр" фестивале - уникаль проект, ул елдан-ел масштаблырак була бара: быел гына да анда меңнән артык театр коллективы катнашты", - диде ТР Дәүләт Советы Рәисе вазыйфаларын башкаручы, Татарстанда яшәүче халыкларның татар телен һәм туган телләрен саклау һәм үстерү мәсьәләләре буенча рәис каршындагы комиссия рәисе Марат Әхмәтов, чарада катнашучыларны сәламләп. Быел фестиваль 13 нче тапкыр уздырыла. Мәктәп этабы гыйнварда, муниципаль этап – февральдә, зона этабы апрельдә узды. Чыгышлар татар, чуаш, удмурт һәм мари телләрендә тәкъдим ителде. Быел читтән торып уку этабында Татарстанның 45 муниципалитетыннан 530 коллектив катнашты, ә иң яхшы 60 коллектив бүләкләү тантанасына чакырылды. Алар арасында Иске Тимошкино урта мәктәбенең «Радуга» театр коллективы (җитәкчесе Кожеманова Елена Васильевна) авыр сугыш чоры турында чуаш телендә куелган спектакльне лаеклы тәкъдим итте. Спектакль улларын фронтка озаткан әнисе турында сөйли - һәм берсе дә исән-сау өенә кайтмый. Яшь артистлар ана кайгысының тирәнлеген, халыкның ныклыгын һәм батырлыгын җиткерә алдылар. Татарстанда игълан ителгән хәрби һәм хезмәт батырлыгы елына туры килгән бу матур һәм күңелне нечкәртә торган эш жюрины битараф калдырмады. Конкурс йомгаклары буенча коллектив, диплом һәм 50 мең сумлык сертификат алып, үз номинациясендә мактаулы III урынны яулады. Бүләкләү тантанасына шулай ук балалар театр коллективлары җитәкчеләре: Иске Илдерәк балалар бакчасы тәрбиячесе Васюткина Любовь Георгиевна  һәм  ЯңаТимошкино төп мәктәбенең мәктәпкәчә төркем тәрбиячесе  Ярославлева Надежда Николаевна чакырылган иде. Алар дипломнар һәм 15 мең сумлык сертификатлар алдылар. Аксубай районын лаеклы тәкъдим иткән өчен республика фестивалендә катнашучыларга, театр түгәрәкләре җитәкчеләренә, Иске Тимошкино һәм Яңа Тимошкино мәктәпләре, Иске Илдерәк балалар бакчасы җитәкчеләренә  рәхмәт белдерәбез, бүләкләр белән котлыйбыз һәм киләчәктә дә иҗади уңышлар телибез!